அபத்தக் களஞ்சியங்கள்!

இத்தாலி உணவான பிஸ்ஸாவை வீட்டுக்கு
வரவழைத்து உண்ணுகிறீர்கள்

அமெரிக்கனைப் போல பர்கர்களை
வாரம் தவறாமல் முழுங்குகிறீர்கள்

சாப்பிட்டவுடன் கோக், பெப்சி குடித்தால்
உடனே செறிக்கும் என்று
அபத்தக் குறிப்பு வேறு சொல்கிறீர்கள்

கரகாட்டம், ஒயிலாட்டம் நிறைந்த நிகழ்ச்சிகளுக்கு
அனுமதி இலவசம் என்றாலும் போக மறுக்கிறீர்கள்

நாதஸ்வரக் கச்சேரி தமிழ் புத்தாண்டில்
ஒலிபரப்பானால் கூட எம்டிவி-க்கு மாற்றி விடுகிறீர்கள்

வெளிநாட்டுக்குப் போனாலும் தமிழ்ச் சங்கம்
வைத்து தாய்மொழியை வளர்க்கிறீர்கள்

பொங்கல் திருவிழாவுக்கு ஒன்று கூடி
"We now invite our chief guest ..." என்று ஆரம்பித்து
"We would like to thank ..." என்று முடிக்கிறீர்கள்

ஆங்கிலேயன் ஆடைகளை உடுத்திக் கொள்கிறீர்கள்
வேட்டி கட்டியவனை கிராமத்தான் என்கிறீர்கள்

கால்சட்டை அணிந்தபடி கோவிலுக்கு சென்று
நம் பெண்கள் தாவணியில் எவ்வளவு அழகு
"ஏன் இப்படி ஆபாச உடை அணிகிறார்கள்?"
என்று புலம்புகிறீர்கள், வெறித்துப் பார்ப்பதை நிறுத்தாமல்.

சேலத்திலிருந்து வந்தவனும், திருச்சியிலிருந்து சென்றவனும்,
சென்னையில் பன்னாட்டு நிறுவனத்தில் வேலை பார்த்து
ஆங்கிலத்திலே உரையாடுகிறீர்கள்.

குழந்தைகளை ஆங்கிலப் பள்ளிகளில் சேர்க்கிறீர்கள்
தமிழைத் தவிர்த்து ஹிந்தி படித்தாலும் தவறில்லை என்கிறீர்கள்.

ஏன் அவன் வீட்டிலும் ஆங்கிலத்திலேயே
பேசுவதில்லை என்று அங்கலாய்க்கிறீர்கள்.

பதிவுகளிலும், பத்திரிகைப் பேட்டிகளிலும் சொல்கிறீர்கள்,
நமது கலாச்சாரமே உலகில் தலைசிறந்தது,
தமிழைக் காக்க எந்நாளும் பாடுபடுவேன் என்று.