சரத்பாபுவுக்கு வோட்டு போடாதீங்க!

1. தமிழர்களாகிய நாம் எப்பவும் வெள்ளை வேட்டி, வெள்ளை சட்டை போடுற அரசியல்வாதிகளுக்கு தான் வோட்டு போடுவோம். (வீட்டுக்குள்ள கறுப்புப் பணத்தை பதுக்கி வைச்சுக்கிறதை எல்லாம் நாம கண்டுக்க மாட்டோம்) இந்த பையன் வெளிநாட்டு உடையான பான்ட், ஷர்ட், கோட் போடுறாரு. இவருக்கு கண்டிப்பா வோட்டு போட கூடாது.
   
   
2. எந்த வேலையும் பாக்காமே அரசியல்வாதி மகனா பொறந்ததுனாலே சில பேரு கோடிக்கணக்கில சொத்து வைத்து வைச்சிருந்தாலும் நாம கேள்வி கேக்க மாட்டோம். ஆனா ஏழையா பொறந்து, நல்லா படிச்சு, 250 பேருக்கு வேலை கொடுத்தாலும் ஒருத்தன் அதே பழைய வீட்டில இருந்தா அவனை "அற்பப் பய"-ன்னு அவதூறு பேசுவோம். பொறம்போக்கு நிலத்தை ஆக்கிரமிக்கிரவன், அடுத்தவங்க நிலத்தில மாளிகை கட்டுவங்களுக்கு தான் நாம் வோட்டு போடுவோம். இவருக்கு போய் நாம வோட்டு போட முடியுமா?
   
   
3. எந்த படிப்பறிவும் இல்லாமே, தொழில் பண்ணின அனுபவமும் இல்லாம, அரசியல் சட்ட திட்டங்களையும் படிக்காம, அரசியல்வாதி மகனா பொறந்தாலே போதும், அவருக்கு ராஜாதி ராஜன், வீரத் தமிழன், அப்படின்னு பட்டம் சூட்டி வரவேற்போம். இரண்டு வேளை சாப்பாடு மட்டுமே கிடைச்ச ஒருத்தன், சிம்னி விளக்கில படிச்சு முன்னேறி MBA வரைக்கும் படிச்சு வந்தாலும், அவனுக்கு அரசியல் அனுபவமில்லை, பொது வாழ்க்கையில அவன் என்ன கிழிச்சான்னு காறித் துப்புவோம். இவருக்கு போய் நாம வோட்டு போட முடியுமா?
   
   
4. தமிழர்கள் எப்பவும் சினிமா நடிகர்களை தான் கடவுளா கும்புடுவோம். அவங்க சினிமாவில ஏழைங்களுக்கு சோறு போடுறது, ஏழைப் பொண்ணுங்களை வில்லன்-கிட்டேருந்து காப்பாத்துறத பாத்து நிஜ வாழ்க்கையிலேயும் நல்லவங்களா இருப்பாங்கன்னு கேனத்தனமா நம்பி "அரசியலுக்கு வந்து எங்களை காப்பாத்து தலைவா"-ன்னு கோஷம் போடுவோம். (அவுங்க தங்கச்சியா நடிச்ச பொண்ணுங்க கூட நீலாங்கரை கடற்கரை மாளிகையில தண்ணிய போட்டு புணர்ந்தாலும், அத நாம கண்டுக்க மாட்டோம்). இந்த பையன் ஜூனியர் ஆர்டிஸ்ட் ரோல் கூட பண்ணலையே, இவருக்கு எப்படி வோட்டு போட முடியும்?
   
   
5. தமிழர்கள் எப்பவும் மொழிப் பற்று-ங்கிற பேர்ல மொழி வெறியை தூண்டி விடுற அரசியல்வாதிங்களுக்கு தான் வோட்டு போடுவோம். (அவுங்க புள்ளைங்க, பேரப் புள்ளைங்க ஆங்கில பள்ளியில படிச்சிட்டு, தமிழுக்கு பதிலா ஹிந்தி படிச்சாலும் கண்டுக்க மாட்டோம். எங்க அய்யா ராஜதந்திரி, அவரு பேரன் ஹிந்தி படிச்சா தான் அவரு சென்ட்ரல் மினிஸ்டேர் ஆக முடியும்னு சொல்லுவோம்! நம்ம புள்ளைங்க வட நாடு போனா "behenchod, saala madrasi hindi nahi aati"-ன்னு திட்டு வாங்க வைப்போம்). இந்த பையனுக்கு தமிழ் சரியா பேசத் தெரியல. ஹிந்தி, ஆங்கிலம் தான் சரளமா பேசுறாரு, இவருக்கு எப்படி நாம வோட்டு போட முடியும்?
   
   
6. இவரோட இணையத் தளம் ஆங்கிலத்தில இருக்கு. இது மன்னிக்க முடியாத குற்றம், இவருக்கு எப்படி ஒரு தமிழன் வோட்டு போட முடியும்? (http://chennaicorporation.gov.in முழுக்க முழுக்க ஆங்கிலத்தில இருந்தாலும், எங்க தமிழினத் தலைவர் படமும், திருக்குறளும் மேல போட்டு இருக்கிறதுனால அதை யாரும் குறை சொல்ல கூடாது)
   
   
7. பிரபல அரசியல் தலைவரோட பையன் வெளிநாட்டில ஒரு வருஷ டிப்ளோமாவை நாலு வருஷம் படிச்சிட்டு வந்தாலும், வெளிநாட்டு பல்கலைக்கழக மேலாண்மை பட்டதாரின்னு புகழ்ந்திட்டு அவருக்கு வோட்டு போடுவோம். இட்லிக் கடை வைச்சிருந்த ஏழைப் பெண்ணுக்கு பொறந்த இவருக்கு நாம எப்படி வோட்டு போட முடியும்?
   

ஆகவே பெரியோர்களே, தாய்மார்களே, உங்கள் பொன்னான, சில்வர் ஆன, வெண்கலமான வாக்குகளை நாட்டைச் சுரண்டி கோடிக்கணக்கில் சொத்து சேர்த்தவர்களுக்கும், கொலை, கொள்ளை, கற்பழிப்பு வழக்குகளில் சிக்கினாலும் இருபது ஆண்டுகளாக ஜாமீனில் அலைபவர்களுக்கும், அங்கங்கே கிழவிகளை கட்டிப் பிடித்து போட்டோ எடுத்துக் கொண்டு, வீட்டுக்கு போய் டெட்டால் போட்டு குளிக்கும் நல்ல மனிதர்களுக்கும், சினிமாவிலே நல்லவனாக நடித்தாலும், நிஜ வாழ்விலே வில்லனா, காமெடியனா என்று தெரியாத நடிகர்களுக்கும், இன்ன பிற கோமாளிகளுக்கு மட்டுமே போட்டு ஐந்தாயிரம் பணம், பிரியாணி, குவார்டர் பாட்டில் சரக்கு வாங்கி சந்தோஷமாக இருக்க உங்களை தாழ்மையுடன் கேட்டுக் கொள்கிறேன்.